🌐
न्युयोर्क | USNepalKhabar
विश्वप्रसिद्ध Empire State Building को सबैभन्दा माथिल्लो भागमा अवैध रूपमा चढेर प्रेम प्रस्ताव गरेका दुई रुसी नागरिकलाई New York Police Department (NYPD) ले पक्राउ गरेको छ।
पक्राउ पर्नेहरू एन्जेला निकोलाउ (३३) र इभान बिर्कुस (३२) हुन्। उनीहरू विश्वभरका अग्ला संरचनाहरूमा जोखिमपूर्ण आरोहण गर्ने साहसिक स्टन्टका लागि परिचित छन्। उनीहरूको जीवन र साहसिक यात्रामा आधारित Netflix को २०२४ को डकुमेन्ट्री Skywalkers: A Love Story समेत सार्वजनिक भइसकेको छ।
प्रहरीका अनुसार, दुवैले करिब १,४५४ फिट (४४३ मिटर) अग्लो भवनको शिखरसम्म पुगेर “When the power of love beats the love of power, the world knows peace” लेखिएको ठूलो ब्यानर प्रदर्शन गरेका थिए। त्यसपछि इभान बिर्कुसले एक घुँडामा बसेर एन्जेला निकोलाउलाई विवाहको प्रस्ताव राखेका थिए। प्रस्ताव स्वीकार गरेपछि दुवैले एकअर्कालाई अँगालो हाल्दै चुम्बन गरेका थिए।
उनीहरू करिब १० मिनेटसम्म भवनको टुप्पोमा बसेका थिए। घटनाको भिडियो र तस्बिर उनीहरूले आफ्ना सामाजिक सञ्जालमार्फत पनि सार्वजनिक गरेका छन्।
प्रारम्भिक अनुसन्धानअनुसार, उनीहरूले सर्वसाधारणका लागि बन्द रहेको १०३औँ तला तर्फको मर्मतसम्भारका लागि प्रयोग हुने प्रवेशद्वार हुँदै माथि पुगेको आशंका गरिएको छ। उनीहरू १०२औँ तलाबाट १०३औँ तलासम्म कसरी पुगे भन्ने विषयमा अनुसन्धान जारी रहेको अधिकारीहरूले बताएका छन्।
NYPD ले सार्वजनिक गरेको Body Camera फुटेजमा प्रहरी अधिकारीले उनीहरूलाई सुरक्षित रूपमा तल झर्न आग्रह गरेको देखिन्छ। अधिकारीले “तपाईंहरू यहाँ हुन मिल्दैन” भनेपछि निकोलाउले आफू सुरक्षित रहेको प्रतिक्रिया दिएकी थिइन्।
प्रहरीले दुवैविरुद्ध Burglary, Reckless Endangerment, Criminal Mischief, Trespass र Disorderly Conduct लगायतका अभियोग दर्ता गरेको जनाएको छ।
उता, Empire State Building व्यवस्थापनले घटनाले भवनका कर्मचारी, पर्यटक वा अवलोकन डेकमा रहेका आगन्तुकहरूको सुरक्षामा कुनै असर नपरेको जनाएको छ। साथै, विवाह प्रस्तावका लागि भवनको आधिकारिक अवलोकन डेक नै सुरक्षित र उपयुक्त स्थान भएको उल्लेख गर्दै यस्ता जोखिमपूर्ण गतिविधिको समर्थन नगर्ने स्पष्ट पारेको छ।
यस घटनाले सामाजिक सञ्जालमा व्यापक चर्चा बटुलेको छ। कतिपयले यसलाई प्रेमको असाधारण अभिव्यक्ति भनेका छन् भने धेरैले सार्वजनिक सुरक्षालाई जोखिममा पार्ने गैरजिम्मेवार गतिविधि भन्दै आलोचना गरेका छन्।